އިންވެސްޓްމަންޓާއި ޓޫރިޒަމް ފުޅާކުރަން ދިވެހި މިޝަންތަކުން ދަނީ މަސައްކަތް ކުރަމުން: ޚާރިޖީ ވަޒީރު

ރާއްޖެއަށް އިންވެސްޓްމަންޓުތައް ގެނައުމަށާއި ޓޫރިޒަމް ޕްރޮމޯޓު ކުރުމަށް ރާއްޖޭން ބޭރުގައި ހުރި ދިވެހިރާއްޖޭގެ މިޝަންތަކުން ކޮންމެ ދުވަހަކު ވެސް މަސައްކަތް ކުރަމުންދާ ކަމަށް ޚާރިޖީ ވަޒީރު މޫސާ ޒަމީރު ވިދާޅުވެއްޖެ އެވެ.

ޕީ. އެސް. އެމް. 'ރާއްޖެ މިއަދު' ޕްރޮގްރާމްގައި ރޭ ވާހަކަފުޅު ދައްކަވަމުން ޚާރިޖީ ވަޒީރު ވިދާޅުވީ، ރާއްޖޭން ބޭރުގައި ދިރިއުޅޭ ދިވެހިންނަށް ކޮންސިޔުލާ ހިދުމަތް ދިނުމުގެ އިތުރުން، ރާއްޖޭގެ ވިޔަފާރި އާއި އިންވެސްޓުމަންޓު އަދި ޓޫރިޒަމް ޕްރޮމޯޓުކުރުމުގެ މަސައްކަތްތައް ދިވެހި މިޝަންތަކުން ކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ތަސައްވުރެއް ކަމަށެވެ.

ޚާރިޖީ ވުޒާރާގައި މަސައްކަތް ކުރަމުންދަނީ މި ސަރަހައްދުގައި ވެސް އެންމެ ތަޖުރިބާކާރު ޚާރިޖީ ދާއިރާގެ ބޭފުޅުން ކަން ފާހަގަކުރައްވައި މިނިސްޓަރ ޒަމީރު ވިދާޅުވީ، ރައީސް މުއިއްޒު އައްޔަނުކުރައްވާފައިވާ ސަފީރުންނާ ވަރަށް ގާތުން ޚާރިޖިއްޔާގެ ޓީމުތައް މަސައްކަތް ކުރަމުންދާ ކަމަށެވެ.

މިގޮތުން، ރާއްޖެއަށް މަޝްރޫއުތަކާއި އިންވެސްޓުމަންޓު އަދި ޓޫރިޒަމް ޕްރޮމޯޓުކުރުމާއި ސަރުކާރުގެ ތަރައްގީގެ އެޖެންޑާ ބޭރު ދުނިޔެއާ ހިއްސާކުރުމުގެ މަސައްކަތްތައް ކޮންމެ ދުވަހަކު ވެސް އެ މިޝަންތަކުން ކުރަމުންދާ ކަމަށް ވަޒީރު ވިދާޅުވިއެވެ.