ޑިއުޓީގައި ހުރި ފުލުހަކު މޫދުގައި ނިޔާވެފައި އޮއްވާ ފެނިއްޖެ
2026 ޖޫން 11 ވާ ބުރާސްފަތި ދުވަހުގެ ދަންވަރުގެ ވަގުތެއްގައި "ޕޮލިސް ލޯންޗް 57" ގައި ޑިއުޓީގައި ހުރި ފުލުހަކު ކުއްލި ގޮތަކަށް ގެއްލިގެން ހޯދަމުން ދަނިކޮށް، މޫދު އަޑިން ނިޔާވެފައި އޮއްވާ ފެނިއްޖެއެވެ.
މި ހާދިސާ ހިނގިކަން އެނގުމާއެކު، ގެއްލުނު ފުލުސް މީހާ ހޯދުމުގެ އޮޕަރޭޝަނެއް ފުލުހުން ވަނީ ވަގުތުން ފަށާފައެވެ. ގިނަ މަސައްކަތްތަކަކަށްފަހު، އެ ފުލުސް މީހާ ފެނިފައިވަނީ މޫދު އަޑީގައި އޮއްވާކަމަށް ފުލުހުން ބުންޏެވެ. އޭނާ ފެނުމާއެކު ވަގުތުން އއ. މަތިވެރި ސިއްހީ މަރުކަޒަށް ގެންގޮސްފައިވާއިރު، ސިއްހީ މަރުކަޒަށް ގެންދިޔައިރުވެސް އޭނާ ނިޔާވެފައިވާ ކަމަށް އެ މަރުކަޒުން މައުލޫމާތު ދީފައިވެއެވެ.
މި ހިތާމަވެރި ހާދިސާއާ ގުޅިގެން ދިވެހި ފުލުހުންގެ ޚިދުމަތުން ބުނީ، ނިޔާވި އޮފިސަރުގެ އާއިލާއަށާއި އޭނާއާއެކު މަސައްކަތްކުރާ މުވައްޒަފުންނަށް މި ދަނޑިވަޅުގައި ބޭނުންވާނެ އެހީތެރިކަމާއި ނަފްސާނީ އެއްބާރުލުން ފޯރުކޮށްދެމުންދާ ކަމަށެވެ. އަދި މި އޮޕަރޭޝަނުގެ ތެރޭގައި އާންމުންގެ ފަރާތުން ލިބުނު ބޮޑު އެހީތެރިކަން ފުލުހުން ވަނީ ޝުކުރުވެރިކަމާއެކު ފާހަގަކޮށްފައެވެ.
މި ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ފުލުހުން މިހާރު ދަނީ މި މައްސަލަ އިތުރަށް ތަހުގީގު ކުރަމުންނެވެ. ނިޔާވި ފުލުސް މީހާއާ ބެހޭ އިތުރު ތަފްސީލެއް ފުލުހުން އަދި ހާމަކޮށްފައެއް ނުވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
