ޕީއެންއެފުން އީސީއަށް ކުރާ ތުހުމަތުތައް ދޮގުކޮށް ކުށްވެރިކޮށްފި

ޕީޕަލްސް ނެޝަނަލް ފްރަންޓް (ޕީއެންއެފް) އިން އިލެކްޝަންސް ކޮމިޝަން (އީސީ) އާ މެދު ކުރަމުންދާ ތުހުމަތުތަކަކީ އެއްވެސް ޙަޤީޤަތެއް ނެތް ދޮގު ވާހަކަތަކެއް ކަމަށް ބުނެ، އެކަން އެ ކޮމިޝަނުން އެންމެ ހަރުކަށި އިބާރާތުން ކުށްވެރިކޮށްފިއެވެ.

އިލެކްޝަންސް ކޮމިޝަނުން ނެރުނު ބަޔާނެއްގައި ފާހަގަކޮށްފައިވާ ގޮތުގައި، ރާއްޖޭގައި ސިޔާސީ ޕާޓީތައް އުފެދި، ޕާޓީތަކަށް މެންބަރުން ވެއްދުމުގެ މަސައްކަތް ފެށުނީއްސުރެ ޢާންމުންނާއި ޕާޓީތަކުން އެންމެ ބޮޑަށް ކުރަމުން އައި ޝަކުވާއަކީ، މީހުންނަށް ނޭނގި އޮޅުވާލައިގެން ޕާޓީތަކަށް މެންބަރުން ވެއްދުމާއި ޕާޓީތަކުން މެންބަރުން ވަކިކުރުމުގެ މައްސަލައެވެ.

އެހެންނަމަވެސް، މި މައްސަލައަށް ދާއިމީ އަދި ހަރުދަނާ ހައްލެއް ގެނައުމަށްޓަކައި، އެކި ދުވަސްވަރު މަތިން ސިޔާސީ ޕާޓީތަކާއި ކަމާގުޅުންހުރި އެކި މުއައްސަސާތަކާ މަޝްވަރާކޮށް ގިނަ އިސްލާހީ ބަދަލުތަކެއް ގެނެސްފައިވާ ކަމަށް އީސީން ބުނެފައިވެއެވެ. ޚާއްޞަކޮށް، ޕާޓީތަކުގެ މެންބަރޝިޕް ނިޒާމުގެ ތެރެއަށް "އީ-ފާސް" ތަޢާރަފްކުރެވުމާއެކު، މިއަދު އެ ނިޒާމު ވެފައިވަނީ އާންމުން ބަލައިގަންނަ، ނުހަނު އިތުބާރު ހުރި އަދި ދެފުށް ފެންނަ ނިޒާމަކަށް ކަމަށް އެ ކޮމިޝަނުން ފާހަގަކުރެއެވެ.

އީސީން ހާމަކުރި ގޮތުގައި، މިހާރު ޤާއިމުކުރެވިފައިވާ ނިޒާމުގެ ދަށުން ކޮންމެ ރައްޔިތަކަށްވެސް އެމީހެއްގެ އަމިއްލަ އީ-ފާސް މެދުވެރިކޮށް، ފުރިހަމަ މިނިވަންކަމާއި އިޚްތިޔާރުގައި ބޭނުން ވަގުތެއްގައި ޕާޓީއަކަށް ވަނުމާއި، ޕާޓީން ވަކިވުމުގެ ފުރުޞަތު އޮވެއެވެ. އެހެންކަމުން މިއީ ހަމައެކަނި އެ ފަރުދަކާއި އެ ޕާޓީއަކާ ދެމެދު ހިނގާ މުޢާމަލާތެއް ކަމަށާއި، މި ނިޒާމުގެ ތެރެއިން އެއްވެސް މީހަކަށް ނޭނގި ޕާޓީން ވަކިކުރުމަކީ ނުވަތަ އެހެން ޕާޓީއަކަށް ބަދަލުކުރުމަކީ އީސީއަށްވެސް އަދި އެހެން އެއްވެސް ފަރާތަކަށްވެސް ކުރެވޭނެ ކަމެއް ނޫން ކަމަށް ބަޔާނުގައި ވެއެވެ.

ނަމަވެސް، މި ޙަޤީޤަތް އޮޅޭގޮތަށް، އާންމުންގެ މެދުގައި އިލެކްޝަންސް ކޮމިޝަނަށާއި ޕާޓީތަކުގެ މެންބަރޝިޕް ނިޒާމަށް އޮތް އިތުބާރު ގެއްލުވާލުމަށް ޕީއެންއެފް އިން މަސައްކަތް ކުރަމުންދާ ކަމަށް އީސީން ވަނީ ތުހުމަތުކޮށްފައެވެ.

އެހެންކަމުން، ޙަޤީޤަތާ ޚިލާފު ދޮގު ވާހަކަތައް ނުފެތުރުމަށާއި، ހުރިހާ ސިޔާސީ ޕާޓީތަކުންވެސް ޒިންމާދާރުކަމާއެކު ސިޔާސީ ޙަރަކާތްތައް ކުރިއަށް ގެންދިއުމަށް އިލެކްޝަންސް ކޮމިޝަނުން ވަނީ ނަޞޭޙަތްތެރިވެ އިލްތިމާސްކޮށްފައެވެ.