ބީއެމްއެލްގެ ޔޫއެސްޑީ ޑެބިޓް ކާޑު ބޭނުންކޮށްގެން ކޮންމެ ހަފުތާއަކު 1،000 ޑޮލަރު ހޯދުމުގެ ފުރުސަތު ހުޅުވާލައިފި

ބޭންކް އޮފް މޯލްޑިވްސް (ބީއެމްއެލް) އިން އެ ބޭންކުގެ ޔޫއެސްޑީ ޑެބިޓް ކާޑު ބޭނުންކުރާ ކަސްޓަމަރުންނަށް ހާއްސަކޮށްގެން، ކޮންމެ ހަފުތާއަކު 1,000 އެމެރިކާ ޑޮލަރުގެ ފައިސާގެ އިނާމެއް ލިބޭ ތަރުހީބީ ޕްރޮމޯޝަނެއް މިއަދު ފަށައިފިއެވެ.

މި ޕްރޮމޯޝަން ކުރިއަށްދާނީ މިއަދުން ފެށިގެން އަންނަ ޖުލައި މަހުގެ 30 ވަނަ ދުވަހުގެ ނިޔަލަށެވެ. މި މުއްދަތުގެ ތެރޭގައި އަލަށް ޔޫއެސްޑީ ޑެބިޓް ކާޑަށް އެދި ހުށަހަޅާ ފަރާތްތަކަށް ވެސް މި ލަކީޑްރޯގައި ބައިވެރިވުމުގެ ފުރުސަތު ލިބިގެންދާނެއެވެ. ބީއެމްއެލް އިން ބުނި ގޮތުގައި މި ކާޑު ބޭނުންކޮށްގެން ދުވަހުން ދުވަހަށް ކުރާ ވިޔަފާރިތަކަށާއި، ބިލްތަކަށް ފައިސާ ދެއްކުމުގެ އިތުރުން އެކި ކަހަލަ ޑިޖިޓަލް މުއާމަލާތްތައް ކުރެވޭނެއެވެ.

މި ލަކީޑްރޯގައި ބައިވެރިވެވޭނީ ކޮންމެ ހަފުތާއަކު މަދުވެގެން 100 ޑޮލަރުގެ މުއާމަލާތް ކުރާ ފަރާތްތަކަށެވެ. މީގެ ތެރޭގައި އެކި ކަހަލަ ސަބްސްކްރިޕްޝަންތަކަށް ފައިސާ ދެއްކުމާއި، ދަތުރުފަތުރުގެ ޓިކެޓް ގަތުމުގެ އިތުރުން އެހެނިހެން ޑިޖިޓަލް ހިދުމަތްތަކަށް ކުރާ ހަރަދުތައް ހިމެނެއެވެ.

ބޭންކުން ހާމަކުރި ގޮތުގައި މި ޕްރޮމޯޝަނުގެ މައިގަނޑު މަގްސަދަކީ ކަސްޓަމަރުންގެ މެދުގައި ޑިޖިޓަލް ޕޭމަންޓްތައް ބޭނުންކުރުން އިތުރުކޮށް، އާންމު ދިރިއުޅުމުގެ ކަންކަމުގައި ޔޫއެސްޑީ ޑެބިޓް ކާޑު ބޭނުންކުރާ ފަރާތްތަކަށް ހިތްވަރުދީ އިނާމު ދިނުމެވެ.

މި ޕްރޮމޯޝަނުގައި ބައިވެރިވާން ބޭނުންވާ ފަރާތްތަކަށް ބީއެމްއެލްގެ ކޮންމެ ބްރާންޗަކުން ނުވަތަ އޮންލައިން ބޭންކިން މެދުވެރިކޮށް ޔޫއެސްޑީ ޑެބިޓް ކާޑަށް އެދި ހުށަހެޅޭނެއެވެ. ބޭންކުން ވަނީ މި ލަކީޑްރޯގައި ބައިވެރިވުމަށްޓަކައި 30 ޖުލައިގެ ކުރިން ކަނޑައެޅިފައިވާ މުއާމަލާތްތައް ފުރިހަމަކުރުމަށް ކަސްޓަމަރުންނަށް އިލްތިމާސްކޮށްފައެވެ.