ބާރަށު މަގުތައް ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ އަމަލީ މަސައްކަތް ފެށުމަށްޓަކައި ކުރަންޖެހޭ ސާރވޭގެ މަސައްކަތްތައް ދަނީ ކުރަމުން

ސަރުކާރުގެ ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން ހއ. ބާރަށު މަގުތައް ޒަމާނީ ފެންވަރަށް ތަރައްޤީކުރުމަށް ކުރިއަށްގެންދާ ބޮޑު މަޝްރޫޢުގެ އަމަލީ މަސައްކަތް ފެށުމަށްޓަކައި ކުރަންޖެހޭ ތަފްސީލީ ސާވޭތަކުގެ މަސައްކަތް މިހާރު ފަށައިގެން ކުރިއަށްދާކަމަށް އާރުޑީސީ އިން ހާމަކޮށްފި އެވެ.

މި މަޝްރޫޢުގެ ދަށުން ބާރަށުގައި ޖުމްލަ 7.56 ކިލޯމީޓަރުގެ ދިގު ރިންގް ރޯޑެއް ތަރައްޤީކުރުމަށް ވަނީ ހަމަޖެހިފައެވެ. މި މަސައްކަތް ހަވާލުކޮށްފައިވަނީ 296.6 މިލިއަނަށްވުރެ ގިނަ ރުފިޔާއަށެވެ. މި މަޝްރޫޢުގެ އެއްބަސްވުމުގައި ސޮއިކޮށްފައިވަނީ 2026 ވަނަ އަހަރުގެ މާރިޗު މަހުގެ 26 ވަނަ ދުވަހުއެވެ. މި މަޝްރޫޢު އެއްކޮށް ނިންމުމަށް ކަނޑައަޅާފައިވަނީ 1280 ދުވަހުގެ މުއްދަތެކެވެ.

މިހާރު ކުރިއަށްދާ ސާވޭގެ މަސައްކަތްތަކުގެ ތެރޭގައި މަގު ހެދުމަށް ބޭނުންވާ ތަފްސީލީ ޓޮޕޮގްރަފިކް ސާވޭއާއި، ބިމުގެ ފަސްގަނޑު ދިރާސާކުރާ ޖިއޯޓެކްނިކަލް ސާވޭގެ އިތުރުން ހައިޑްރޮލޮޖިކަލް ސާވޭތައް ހިމެނެއެވެ. މީގެ އިތުރުން ކަނޑައެޅިފައިވާ އުސޫލުތަކާ އެއްގޮތަށް، މަޝްރޫޢުގެ ސަބަބުން ތިމާވެއްޓަށް ކުރާނެ އަސަރުތައް ބަލާ އީއައިއޭ ރިޕޯޓު ތައްޔާރުކުރުމުގެ މަސައްކަތްވެސް ކުރިއަށްދާނެއެވެ.

މި މަޝްރޫޢުގެ ދަށުން ބާރަށުގެ މަގުތަކުގައި ފެން ހިންދާ ނިޒާމު ގާއިމުކޮށް، ތާރު ނުވަތަ އަސްފަލްޓް އަޅައިގެން މަގުތައް ޒަމާނީ ފެންވަރަށް ތަރައްޤީކުރާނެއެވެ. މީގެ ތެރޭގައި އެގްރިގޭޓް ބޭސް ކޯސް އެޅުމާއި، ޕްރައިމް ކޯޓު އެޅުމަށްފަހު ތާރު އެޅުމުގެ މަސައްކަތް ހިމެނެއެވެ. އަދި މަގުތަކުގައި ކާބްސްޓޯން ޖަހައި، ގައު އަތުރައިގެން ދުވާރު ހެދުމާއި، ގަސް އިންދުމަށް ޚާއްޞަ ޓްރީޕިޓްސް ބެހެއްޓުމަށްވެސް ވަނީ ނިންމާފައެވެ.

މަގުތަކުގެ ރައްކާތެރިކަން ކަށަވަރުކުރުމުގެ ގޮތުން މަގުމަތީގެ ނިޝާންތައް ކުރެހުމާއި، ލޭންތައް ވަކިކުރުމާއި، ޒީބްރާ ކްރޮސިންތައް ހެދުމުގެ މަސައްކަތް މި މަޝްރޫޢުގެ ތެރެއިން ކުރިއަށްދާނެއެވެ. ހަމައެއާއެކު ސްޕީޑް ބްރޭކަރުތަކާއި ޓްރެފިކް ނިޝާން ބޯޑުތައް ހަރުކުރުމުގެ އިތުރުން، މުޅި ރިންގް ރޯޑުގައި ފައުންޑޭޝަން އަޅައި ކޭބަލް ވަޅުލުމަށްފަހު ޒަމާނީ މަގުބައްތިތައް ހަރުކުރުމަށް ވަނީ ހަމަޖެހިފައެވެ.

މި މަޝްރޫޢުގެ ތެރެއިން މަގުތަކުގެ އާ ލެވެލްއާ އެއްގޮތްވާ ގޮތަށް، މިހާރު ހުރި ޔުޓިލިޓީ ޖަންކްޝަންތައް އުސްކުރުން ނުވަތަ ތިރިކުރުން ފަދަ ބަދަލުތައް ގެނައުމަށްވެސް ވަނީ ރޭވިފައެވެ. މި މަޝްރޫޢު ނިމުމުން ބާރަށުގެ ރައްޔިތުންނަށް ދިމާވެފައިވާ މަގުތަކުގެ ދަތިކަމަށް ދާއިމީ ހައްލެއް ލިބި، ރަށުގެ މަލަމަތި އިތުރަށް ފުރިހަމަވެގެންދާނެއެވެ.