ސަރުކާރުގެ މަޝްރޫޢުތައް 2028 ވަނަ އަހަރުގެ މެދާ ހަމައަށް ނިންމާލެވޭނެ: މިނިސްޓަރ މުއްތަލިބު

ސަރުކާރުން ކުރިއަށްގެންދާ ތަރައްޤީގެ ހުރިހާ މަޝްރޫޢުތަކެއް 2028 ވަނަ އަހަރުގެ މެދާ ހަމައަށް ނިންމާލެވޭނެ ކަމަށް މިނިސްޓަރ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް ޑރ. ޢަބްދުﷲ މުއްތަލިބު ވިދާޅުވެއްޖެއެވެ.

މިދިޔަ ހޯމަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން މިނިސްޓަރ ވިދާޅުވީ، ކުރީގެ ސަރުކާރުން މި ސަރުކާރަށް ވާރުތަވެފައިވާ މަޝްރޫޢުތަކާއި އަދި އަލަށް ފަށާފައިވާ މަޝްރޫޢުތައް ތަންފީޒު ކުރުމުގައި ގޮންޖެހުންތަކެއް ހުރި ނަމަވެސް، ކަނޑައެޅިފައިވާ ތާވަލާ އެއްގޮތަށް މަސައްކަތްތައް ނިންމުމަށް ސަރުކާރުން މަސައްކަތް ކުރަމުންދާ ކަމަށެވެ.

މިނިސްޓަރ މުއްތަލިބު ފާހަގަކުރެއްވި ގޮތުގައި، އެމްޑީޕީގެ ކުރީގެ ސަރުކާރުން ކޮންޓްރެކްޓް ނުކޮށް ހުރި، ނުވަތަ ހުއްޓިފައިވާ އަދި ބޮޑެތި ލަސްތަކެއް ކުރިމަތިވެފައިވާ ގާތްގަނޑަކަށް 40 ބިލިއަން ރުފިޔާގެ މަޝްރޫޢުތަކެއް މި ސަރުކާރަށް ވަނީ ވާރުތަވެފައެވެ. ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވަނީ އެ މަޝްރޫޢުތައް ހުއްޓާނުލައި، މި ސަރުކާރުން ވެފައިވާ ވަޢުދުތަކާ އެކު ކުރިއަށް ގެންދިއުމަށެވެ.

ދައުލަތުގެ ބަޖެޓުގެ ތެރެއިން މިހާ ގިނަ މަޝްރޫޢުތަކެއް އެއްފަހަރާ ކުރިއަށް ގެންދިއުމަކީ ބޮޑު ގޮންޖެހުމެއްކަން ފާހަގަކުރައްވަމުން މިނިސްޓަރ ވިދާޅުވީ، މަސައްކަތްތައް ބޭނުންވި ބާރުމިނުގައި ކުރިއަށް ނުދާކަން ސަރުކާރުން ވެސް ގަބޫލުކުރާ ކަމަށެވެ. އަދި ބައެއް މަޝްރޫޢުތަކަށް މިކަމުގެ ސަބަބުން ލަސްތަކެއް ކުރިމަތިވެފައިވާ ކަމަށްވެސް އެމަނިކުފާނު ވިދާޅުވިއެވެ.

ނަމަވެސް، މިހާރު މަޝްރޫޢުތައް ކުރިއަށް ގެންދާނެ ފުރިހަމަ ތާވަލެއް އެކުލަވާލެވިފައިވާ ކަމަށާއި، 2028 ވަނަ އަހަރުގެ މެދާ ހަމައަށް ހުރިހާ މަޝްރޫޢުތަކެއް ނިންމާލެވޭނެ ކަމުގެ ފުރިހަމަ އިތުބާރު އެބައޮތް ކަމަށް މިނިސްޓަރ ވިދާޅުވިއެވެ. ސަރުކާރުގެ އަމާޒަކީ އެ މުއްދަތުގެ ތެރޭގައި މަޝްރޫޢުތައް ނިންމައި، އޭގެ މަންފާ ރައްޔިތުންނަށް ލިބެން ފެށުން ކަމަށްވެސް މިނިސްޓަރ މުއްތަލިބު ވިދާޅުވިއެވެ.