ޚާން ޔޫނުސް އަށް އިސްރާއީލުގެ ވަރުގަދަ ހަމަލާތަކެއް

ޚާން ޔޫނުސްގެ އިރުމަތީ ސަރަހައްދުގައި އުޅޭ މީހުން އެހެން ހިސާބުތަކަށް ބަދަލުވުމަށް އިސްރާއީލުން އެންގުމަށްފަހު ވަރުގަދަ ހަމަލާތަކެއް އެސަރަހައްދަށް އިސްރާއީލުން އަމާޒުކުރަން ފަށައިފިއެވެ. 

ތިން ދުވަހުގެ މުއްދަތަށް މިހަމަލާތައް ދިގު ދެމިގެންގޮސްފައިވާއިރު ޚާން ޔޫނުސްގައި ދިރިއުޅޭ އެތައް ބަޔަކަށް ފެނާއި ކާނާއި ފޯރުކޮށްދޭނެ ގޮތެއް ނެތްއިރު އެމީހުންނަށް އެހިސާބު ދޫކޮށް ދެވޭނެ ގޮތެއްވެސް ނެތެވެ. ޚާންޔޫނުސްގައި ހުރި އަލްޖަޒީރާގެ ނޫސްވެރިޔާ ބުނާގޮތުގައި ޚާން ޔޫނުސްގައި ޚިދުމަތްދެމުންދާ ހަމައެކަނި ހޮސްޕިޓަލުކަމުަގައިވާ ނަސްރު ހޮސްޕިޓަލަށް މިވަގުތު ވަނީ ވަރަށް ބޮޑަށް ލެއަށް ބޭނުންވެފައެވެ. އިސްރާއީލުން ދެމުންދާ ހަމަލާތަކުގައި ޒަޚަމްވަމުންދާ މީހުން ކޮންމެ މިނެޓަކު އެހޮސްޕިޓަލަށް އަންނަނީ ގެންނަމުންނެވެ. 

މީހުން ސަލާމަތްކުރުމުގެ މަސައްކަތްކުރަމުން އަންނަ ފަރާތްތަކަށްވެސް އެސަރަހައްދަށް ނުދެވޭކަމަށް އަލްޖަޒީރާގެ ނޫސްވެރިޔާ ބުނެއެވެ. އެހެންކަމުން ޒަޚަމްވާ މީހުންނާ ޝަހީދުވާ މީހުންގެ އަދަދު އެތައް ގުނައެއް މަތިވާނެކަމަށް ވަނީ ބެލެވިއެވެ. ޣައްޒާގެ ސިވިލް ޑިފެންސުން ހާމަކޮށްފައިވާ ގޮތުގައި ޚާން ޔޫނުސް އަށް އިސްރާއީލުން ދެމުންދާ ހަމަލާތަކުގައި މިހާތަނަށް 121 މީހުންގެ ފުރާނަ ވަނީ ގެއްލިފައެވެ. އޭގެތެރޭގައި އަންހެނުންނާއި ކުޑަކުދިންވެސް ހިމެނެއެވެ. 

ވައިގެ މަގުންނާއި އެއްގަމު މަގުން ސޭފް ޒޯން ށް ދިޔުމަށް މަސައްކަތްކުރާ ކޮންމެ މީހަކަށް އިސްރާއީލުން އަންނަނީ ހަމަލާދެމުންކަމަށް ނޫސްވެރިޔާ ބުނެއެވެ.