އަޟްޙާ ޢީދު ފާހަގަކުރުމަށް އެމްއޭސީއެލް އިން "ޢީދު ހަވީރު 1447" ގައި ކުލަގަދަ ހަރަކާތްތަކެއް ހިންގަނީ

ކުރިއަށް އޮތް އަޟްޙާ ޢީދާ ގުޅުވައިގެން މުޖުތަމަޢުގެ އެކުވެރިކަމާއި އެއްބައިވަންތަކަން އާލާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމުގެ މަތިން ސަރުކާރުން ބާއްވާ "ޢީދު ހަވީރު 1447" ފެސްޓިވަލްގައި މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ވަރަށް ފޯރިގަދަ ހަރަކާތްތަކަކާއެކު ބައިވެރިވުމަށް ނިންމައިފިއެވެ.

މި ފެސްޓިވަލް ކުރިއަށް ދާނީ މޭ މަހުގެ 27 އިން 29 ގެ ނިޔަލަށް، ކޮންމެ ދުވަހެއްގެ ހަވީރު 4:00 އިން 6:00 އަށް ހުޅުމާލެ ސެންޓްރަލް ޕާކުގައެވެ. މި ހަރަކާތުގެ ތެރެއިން އެމްއޭސީއެލްގެ ޚާއްޞަ ސްޓޯލްތަކާއި ތަފާތު ކުޅިވަރުތައް ފެނިގެންދާނެއެވެ. އެމްއޭސީއެލްގެ ސްޓޯލް ހުންނާނީ ސެންޓްރަލް ޕާކުގެ އިރުމަތީ އެންޓްރެންސްގައެވެ.

މި އަހަރުގެ ޢީދު ހަވީރުގައި އެމްއޭސީއެލް އިން އިސްކަންދީފައިވަނީ ދިވެހިވަންތަ، ސަޤާފީ އާދަކާދަތައް ދިރުވުމަށެވެ. އެގޮތުން ކޯޑީ ހިފުމާއި، ބޮޑުބެރާއި، މާލީގެ އެކިއެކި ހަރަކާތްތައް ކުރިއަށްދާނެއެވެ. އަދި ކުޑަކުދިންނަށް ޚާއްޞަކޮށްގެން މަޤުބޫލު ކާޓޫން ކެރެކްޓާސްގެ މެސްކޮޓްތައް ވެސް އެކި ދުވަސްމަތިން މި ސްޓޯލުން ފެންނާނެއެވެ.

ޢާއިލީ ގުޅުން ބަދަހިކުރުމަށް ފަރުމާކޮށްފައިވާ މި ސްޓޯލްގައި ކުޑަކުދިންނަށް އެރޭނެ ގޮތަށް ފަނުން ޒީނަތްތެރިކޮށްފައިވާ "ޓްރީހައުސް" (ގަސްމަތީ ގެ) އެއް ހުންނާނެއެވެ. މީގެ އިތުރުން ރެކިން ބޯލް، ވައިޕް އައުޓް އިންފްލެޓަބަލް، އަދި ބަބުލް ހައުސް ފަދަ މަޖާ ކުޅިވަރުތަކުގެ އިތުރުން ހީނާ އާޓް އަދި ފޭސް ޕެއިންޓިންގ ކޯނަރތައް ވެސް ކުޑަކުދިންނަށް ޚާއްޞަކޮށްފައިވެއެވެ.

މިއަހަރުގެ ޢީދު ހަވީރުގެ އެންމެ ޚާއްޞަ އެއް ހަރަކާތަކީ، ރާއްޖޭގެ މަޝްހޫރު ފުޓުބޯޅަ ތަރި ޢަލީ އަޝްފާޤު (ދަގަނޑޭ) އެމްއޭސީއެލްގެ ސްޓޯލްގައި ބައިވެރިވެ، އޭނާގެ ފުޓުބޯޅަ ހުނަރުތައް ދައްކާލުމެވެ.

އެމްއޭސީއެލް އިން ވަނީ އަޟްޙާ ޢީދުގެ މި އުފާވެރި ހަރަކާތްތަކުގައި ވީހާވެސް ގިނަ ރައްޔިތުން ބައިވެރިވުމަށް ޢާންމުކޮށް ދަޢުވަތު އަރުވާފައެވެ. މި ހަރަކާތަކީ ޢީދުގެ އުފާ ފާޅުކުރުމާއެކު، ދިވެހި ސަޤާފަތާއި އާދަކާދަތައް އަންނަން އޮތް ޖީލުތަކަށް އުނގަންނައިދީ، އެކުވެރި މާޙައުލެއް ބިނާކުރުމަށް ހިންގޭ މުހިންމު ހަރަކާތެކެވެ.