މީރާގެ ކޮމިޝަނަރު ޖެނެރަލް އޮފް ޓެކްސޭޝަންގެ މަގާމަށް ފާތިމަތު އަމީޒާ އައްޔަންކުރުމަށް މަޖިލީހުން ފާސްކޮށްފި

މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގެ ކޮމިޝަނަރު ޖެނެރަލް އޮފް ޓެކްސޭޝަންގެ މަގާމަށް، ގދ. ގައްދޫ، ކޯޒީރައުންޑް، ފާތިމަތު އަމީޒާ އައްޔަންކުރުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ.

މި މަގާމަށް އަމީޒާ އައްޔަންކުރުމަށް ފާސްކުރީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޖިލީހަށް ހުށަހެޅުއްވި ނަންފުޅުތަކުގެ ތެރެއިން، މަޖިލީހުގެ މިއަދުގެ ޖަލްސާގައި ނެގުނު ވޯޓުގައި ބައިވެރިވެވަޑައިގެންނެވި 64 މެންބަރުންގެ އިއްތިފާގުންނެވެ.

މީރާގެ ޓެކްސް ޗީފްގެ މަގާމު ހުސްވީ، އެ މަގާމުގައި ކުރިން ހުންނެވި ޙަސަން ޒަރީރު، މިނިސްޓަރ އޮފް ފައިނޭންސް އެންޑް ޕަބްލިކް އެންޓަޕްރައިސަސްގެ މަގާމަށް ރައީސުލްޖުމްހޫރިއްޔާ އައްޔަންކުރެއްވުމާ ގުޅިގެން، އޭނާ އެ މަގާމުން އިސްތިއުފާ ދެއްވުމުންނެވެ.

މި މަގާމަށް ކުރިމަތިލުމަށް ހުޅުވާލި ފުރުސަތުގައި ކުރިމަތިލީ ފަރާތްތަކުގެ ތެރެއިން ރައީސުލްޖުމްހޫރިއްޔާ މަޖިލީހަށް ފޮނުއްވީ ދެ ބޭފުޅެއްގެ ނަންފުޅެވެ. އެއީ ފާތިމަތު އަމީޒާގެ އިތުރުން ހއ. ތަކަންދޫ، ސާދާ، މުޙައްމަދު ޙަލީމް ޢަބްދުﷲ އެވެ.

މި ދެ ބޭފުޅުންނާ ބެހޭގޮތުން ރައްޔިތުންގެ މަޖިލީހުގެ އިގްތިސާދީ ކޮމިޓީން ދިރާސާކޮށް އެކުލަވާލި ރިޕޯޓުގައިވާ ގޮތުން، އެންމެ މަތީ މާކްސްއެއް ލިބިވަޑައިގަތީ އަމީޒާއަށެވެ. އޭނާއަށް ކޮމިޓީން 92.44 އިންސައްތަ މާކްސް ދީފައިވާއިރު، މުޙައްމަދު ޙަލީމަށް ލިބިވަޑައިގަތީ 82.89 އިންސައްތައެވެ. ކޮމިޓީން ނިންމާފައިވަނީ މި ދެ ބޭފުޅުންނަކީވެސް އެ މަގާމަށް ޝަރުތު ހަމަވާ ދެ ބޭފުޅުން ކަމަށެވެ. ނަމަވެސް މަޖިލީހުގެ ތަޅުމުގައި ފުރަތަމަ ވޯޓަށް އެހުނު އަމީޒާގެ ނަންފުޅު ވަނީ އިއްތިފާގުން ފާސްވެފައެވެ.

ފާތިމަތު އަމީޒާއަކީ އޮސްޓްރޭލިއާގެ މޮނާޝް ޔުނިވާސިޓީން އެކައުންޓިން ދާއިރާއިން މާސްޓާސް ޑިގްރީ ހާސިލްކުރައްވާފައިވާ ބޭފުޅެކެވެ. އޭނާ މިހާތަނަށް ހުންނެވީ މީރާގެ ޑެޕިއުޓީ ކޮމިޝަނަރު ޖެނެރަލް އޮފް ޓެކްސޭޝަންގެ މަގާމުގައެވެ.