ބީއެމްއެލް އިން އިތުރު 30 ފުރޮޅުލީ ގޮނޑި ހަދިޔާކޮށްފި

ހިނގާބިނގާވެ އުޅުމުގައި ނުކުޅެދުންތެރިކަން ހުންނަ ފަރާތްތަކަށް އެހީތެރިކަން ފޯރުކޮށްދިނުމަށް ބޭންކް އޮފް މޯލްޑިވްސް (ބީއެމްއެލް) އިން ކުރިއަށްގެންދާ އިޖުތިމާއީ ޒިންމާގެ ދަށުން، އިތުރު 30 ފުރޮޅުލީ ގޮނޑި ހަދިޔާކޮށްފި ކަމަށް އެ ބޭންކުން މިދިޔަ ބުދަ ދުވަހު އިއުލާނުކޮށްފިއެވެ.

2017 ވަނަ އަހަރުން ފެށިގެން މެދުނުކެނޑި ކުރިއަށްގެންދާ މި ޕްރޮގްރާމުގެ ދަށުން މިހާތަނަށް ރާއްޖޭގެ 105 އަށްވުރެ ގިނަ ރަށުގައި ދިރިއުޅޭ ފަރާތްތަކަށް 360 އަށްވުރެ ގިނަ ފުރޮޅުލީ ގޮނޑި ވަނީ ފޯރުކޮށްދެވިފައެވެ.

ބީއެމްއެލް އިން ހާމަކުރި ގޮތުގައި، މި އަހަރު މި ޕްރޮގްރާމް ވަނީ ކުރިއަށްވުރެ ފުޅާކޮށްފައެވެ. އެގޮތުން، ގިނަ ބައެއްގެ ބޭނުންތަކަށް ރިއާޔަތްކޮށް، މިފަހަރު ހަދިޔާކުރި ގޮނޑިތަކުގެ ތެރޭގައި އަމިއްލައަށް ދުއްވޭ މޮޓޮރައިޒްޑް ފުރޮޅުލީ ގޮނޑީގެ އިތުރުން ހާއްސަ މެނުއަލް ފުރޮޅުލީ ގޮނޑިތައް ވެސް ހިމެނެއެވެ.

މި އާ މެނުއަލް ގޮނޑިތަކަކީ އަމިއްލައަށް ގޮނޑި ދުއްވުމުގައި ދަތިތަކެއް ހުންނަ، އަދި އާއިލާގެ މެންބަރުންނާއި އެހީތެރިންގެ އެހީތެރިކަމަށް ބޭނުންވާ ކުޑަކުދިންނާއި ބޮޑެތި މީހުންނަށް ހާއްސަކޮށް ފަރުމާކޮށްފައިވާ ގޮނޑިތަކެކެވެ.

މި ހަރަކާތަކީ މުޖުތަމައުގެ ދުޅަހެޔޮކަމަށާއި، ނުކުޅެދުންތެރިކަން ހުންނަ ފަރާތްތަކުގެ މިނިވަންކަމާއި ދިރިއުޅުމުގެ ފެންވަރު މަތިކުރުމަށް ބޭންކުން ދޭ އަހައްމިއްޔަތުކަން ރަމްޒުކޮށްދޭ ކަމެއް ކަމަށް ބީއެމްއެލް އިން ބުނެއެވެ. ބޭންކުގެ އަމާޒަކީ މިފަދަ އެހީތެރިކަމުގެ ސަބަބުން ނުކުޅެދުންތެރިކަން ހުންނަ ފަރާތްތަކަށާއި އެ ފަރާތްތަކުގެ އާއިލާތަކަށް ލުއިފަސޭހަކަމެއް ހޯދައިދިނުމެވެ.