ޔޫ.އެން.ސީ.ސީ.ޑީ ކޮޕް-17 ގެ ހައިލެވެލް ސެގްމެންޓުގައި މިނިސްޓަރ ޢަލީ ޝަރީފް ބައިވެރިވެވަޑައިގެންފި

މަންގޯލިއާގެ އުލާންބާތަރުގައި މިހާރު ކުރިއަށްދާ ޔުނައިޓެޑް ނޭޝަންސް ކޮންވެންޝަން ޓު ކޮމްބެޓް ޑެޒަޓިފިކޭޝަން (ޔޫ.އެން.ސީ.ސީ.ޑީ) ގެ 17 ވަނަ ކޮންފަރެންސް އޮފް ދަ ޕާޓީސް (ކޮޕް-17) ގެ ހައިލެވެލް ސެގްމެންޓުގައި ދިވެހިރާއްޖޭގެ ވަފުދުން ބައިވެރިވެވަޑައިގެންފިއެވެ.

މި ބައްދަލުވުމުގައި ދިވެހިރާއްޖޭގެ ފަރާތުން އިސްކޮށް ބައިވެރިވެވަޑައިގަންނަވަނީ މިނިސްޓަރ އޮނަރަބަލް ޢަލީ ޝަރީފެވެ. މިނިސްޓަރުގެ އަރިހުގައި ޑިރެކްޓަރ އޮފް އެންވަޔަރަންމަންޓަލް ކޮންޒަވޭޝަން އަޙްމަދު ޝާން އަދި ސީނިއަރ ސަރވެޔަރ ޢާއިޝަތު އަލްހާން ޙަމީދު ބައިވެރިވެވަޑައިގަންނަވައެވެ.

ކޮޕް-17 ގެ ދެވަނަ ހަފްތާގައި ކުރިއަށްދާ މި ހައިލެވެލް ސެގްމެންޓަކީ ޔޫ.އެން.ސީ.ސީ.ޑީގެ މެންބަރު 197 ޤައުމުގެ ވަޒީރުންނާއި ވަފުދުތަކުގެ ވެރިން އެއްތަނަކުން ބައްދަލުވާ މުހިންމު ޕްލެޓްފޯމެކެވެ. މި ސެގްމެންޓް މައިގަނޑު ގޮތެއްގައި އަމާޒުކޮށްފައިވަނީ ވަޒީރުންގެ މެދުގައި ބޭއްވޭ ތިން މައިގަނޑު މަޝްވަރާ ބައްދަލުވުމަކަށެވެ. އޭގެ ތެރޭގައި ހިމެނެނީ ދުޅަހެޔޮ ބިމާއި ވިލުންތެރިކަން އިތުރުކުރުމަށް ބޭނުންވާ މާލީ އީޖާދީ ވަސީލަތްތަކާ ގުޅޭގޮތުންނާއި، ހުސްބިންތަކާއި ދަނޑުވެރިކަމާ ގުޅޭގޮތުންނާއި، އަދި ރައްކާތެރިކަމާއި ހިޖުރަކުރުމާ ގުޅޭގޮތުން ކުރެވޭ މަޝްވަރާތަކެވެ. މީގެއިތުރުން މި ކޮންފަރެންސްގައި ކަނޑައެޅިފައިވާ މައިގަނޑު ހަތަރު ދާއިރާ ކަމަށްވާ؛ ފައިނޭންސް، ފެން، ބިމާއި އިންސާނުން، އަދި ކާބޯތަކެތީގެ ނިޒާމުތަކާ ގުޅޭގޮތުން މަތީ ފަންތީގެ އިވެންޓުތައް ކުރިއަށްދާނެއެވެ.

މި ކޮންފަރެންސްގައި ރާއްޖެއިން ވަނީ ކުދި ޖަޒީރާ ޤައުމުތަކަށް ކުރިމަތިވެފައިވާ ބިމުގެ މައްސަލަތަކަށް ޚާއްޞަ ސަމާލުކަމެއް ދިނުމުގެ މުހިންމުކަމުގެ މައްޗަށް އަލިއަޅުވާލާފައެވެ. އެގޮތުން ގޮނޑުދޮށް ގިރުމާއި، ބިމުގެ ފެން ފަށަލައަށް ލޮނު އެޅުމާއި، ކަނޑުގެ ލޮނގަނޑު އުފުލުމާއި، އަދި މީރުފެން ލިބުން ދަތިވުން ފަދަ ކަންކަމަކީ ހަނަފަސް ސަރަޙައްދުތަކަށް ދިމާވާ މައްސަލަތަކެކޭ އެއްފަދައިން ޔޫ.އެން.ސީ.ސީ.ޑީގެ އޮނިގަނޑުތަކުގައާއި، މާލީ އެހީތެރިކަން ފޯރުކޮށްދޭ ނިޒާމުތަކުގައި އަދި ސައިންޓިފިކް ދިރާސާތަކުގައި ބަލައިގަންނަންޖެހޭ މުހިންމު ކަންކަން ކަމުގައި ރާއްޖެއިން ވަނީ ފާހަގަކޮށްފައެވެ.