މާލޭގެ ތިން ސަރަހައްދެއްގައި އަލިފާނުގެ ހާދިސާތަކެއް ހިނގައިފި

މިއަދު ހެނދުނުގެ ވަގުތެއްގައި މާލޭގެ ތިން ސަރަހައްދެއްގައި ވަކިވަކިން އަލިފާނުގެ ތިން ހާދިސާއެއް ހިނގައިގެން ރިޕޯޓްކޮށްފައިވާ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ. މި ހުރިހާ ހާދިސާތަކެއްގައި އެމްއެންޑީއެފްގެ ފަޔަރ އެންޑް ރެސްކިއު ޓީމުތަކުން ދަނީ ހަރަކާތްތެރިވަމުންނެވެ.

ފުރަތަމަ ހާދިސާ ރިޕޯޓްކޮށްފައިވަނީ ކަލާފާނު ސްކޫލް ކައިރީގައި ހުރި ގެއަކުން ބޯކޮށް ދުން އަރަމުންދާ ކަމަށެވެ. އެ ސަރަހައްދުގައި ފަޔަރ ފައިޓަރުން ހަރަކާތްތެރިވެ، ހާލަތު ކޮންޓްރޯލް ކުރުމުގެ މަސައްކަތް ވަނީ ކޮށްފައެވެ.

ދެވަނަ ހާދިސާ ހިނގާފައިވަނީ ގ. ހުދުރުވާގޭގައެވެ. މި ހާދިސާގައި އެގޭގެ އެޕާޓްމަންޓެއްގެ އެއް ކޮޓަރި ވަނީ ބޭނުން ނުކުރެވޭ ވަރަށް އަނދާފައެވެ. އާންމުވެފައިވާ ފޮޓޯތަކުން ފެންނަ ގޮތުގައި، ކޮޓަރީގައި ހުރި އެއަރކޮންޑިޝަނާއި އެނދު ވަނީ ވަރަށް ބޮޑަށް އަނދާ ހަލާކުވެފައެވެ. އަދި ދުމުގެ އަސަރުކޮށްގެން މުޅި ކޮޓަރީގެ ފާރުތައް ވަނީ ކަޅުވެފައެވެ. މި އެޕާޓްމަންޓަކީ ހަތަރު މީހުން ދިރިއުޅެމުންދާ ތަނެކެވެ.

މީގެ އިތުރުން، މާފަންނު "ޖަޔާ ކުޝަން" ކައިރީގައި ހުރި އިމާރާތެއްގައިވެސް އަލިފާނުގެ ހާދިސާއެއް ވަނީ ހިނގާފައެވެ. މުނިޔާ މަގުގައި ހުރި މި އިމާރާތަކީ ފޮތި ގުދަން ކުރަން ބޭނުންކުރާ ތަނެކެވެ. އަލިފާންގަނޑު ކޮންޓްރޯލް ކުރެވުނު ނަމަވެސް، އެ ސަރަހައްދުން ބޯކޮށް ދުން އަރަމުން ދިޔުމުގެ ސަބަބުން ފަޔަރ ޓީމުތަކުން ވަނީ އެ ސަރަހައްދުގައި ގިނަ ވަގުތުތަކެއް ވަންދެން ހަރަކާތްތެރިވެފައެވެ.

މި ހާދިސާ ހިނގި ސަރަހައްދުގެ ހަނި ގޯޅިތަކުގައި ބޯކޮށް ދުން ފެތުރިފައިވާ މަންޒަރު ފެންނަ ވީޑިއޯތައް ސޯޝަލް މީޑިއާގައި ވަނީ އާންމުވެފައެވެ. މިއީ ބިދޭސީން ދިރިއުޅޭ ތަނެއް ކަމަށް މައުލޫމާތު ލިބިފައިވާއިރު، އަލިފާން ރޯވުމާއެކު އެތަނުގައި ތިބި މީހުން ވަނީ ފޮށިތަކާއި އަންނައުނު ހިފައިގެން މަގުމައްޗަށް ނުކުމެފައެވެ.

މި ހާދިސާތައް ހިނގަން މެދުވެރިވި ސަބަބު ދެނެގަތުމުގެ މަސައްކަތް ކަމާބެހޭ އިދާރާތަކުން މިހާރު ދަނީ ކުރަމުންނެވެ. އެއްވެސް މީހަކަށް ސީރިއަސް އަނިޔާއެއް ލިބުނު ކަމުގެ ރިޕޯޓެއް މިހާތަނަށް ލިބިފައެއް ނުވެއެވެ.