ފަހި ދިރިއުޅުން ކޯޕަރޭޝަނުގެ ފްލެޓުތަކުގެ ރައްކާތެރިކަން އިތުރަށް ވަރުގަދަކުރުމުގެ މަސައްކަތް ފަށައިފި

ފަހި ދިރިއުޅުން ކޯޕަރޭޝަން (އެފްޑީސީ) އިން އިމާރާތްކުރަމުންދާ ހައުސިންގ ޔުނިޓުތަކުގެ ތެރެއިން، ކުޑަކުދިންނާއި ޚާއްޞަ އެހީއަށް ބޭނުންވާ ފަރާތްތައް ދިރިއުޅޭ އެޕާޓްމަންޓްތަކުގެ ރައްކާތެރިކަން އިތުރަށް ވަރުގަދަކުރުމަށް އަޅަންޖެހޭ ފިޔަވަޅުތަކާ ގުޅޭގޮތުން މަޝްވަރާތައް ފަށައިފިއެވެ.

އެފްޑީސީގެ މެނޭޖިންގ ޑިރެކްޓަރ ޙަމްދާން ޝަކީލް 'އެކްސް' ގައި ކުރެއްވި ޕޯސްޓެއްގައި ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން، "އަމާން އުދަރެސް" އަދި "އަމާން ދޯދި" ޓަވަރުތަކުގައި ކުޑަކުދިންނާއި ޚާއްޞަ އެހީއަށް ބޭނުންވާ މީހުން ދިރިއުޅޭ ޔުނިޓުތައް ދެނެގަތުމުގެ މަސައްކަތް މިހާރު ފަށާފައިވާ ކަމަށެވެ. އަދި ހުރިހާ ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް، ޚާއްޞަކޮށް އަވަސް ފިޔަވަޅުތަކެއް އަޅަންޖެހޭ ޔުނިޓުތަކަށް އިސްކަންދީގެން އަޅަންޖެހޭ ފިޔަވަޅުތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރަމުންދާ ކަމަށް އޭނާ ވިދާޅުވިއެވެ.

އެފްޑީސީން މި ފިޔަވަޅުތައް އަޅަން ފަށާފައި މިވަނީ، ފަހަކަށް އައިސް ކުޑަކުދިންނަށް ކުރިމަތިވި ހިތާމަވެރި ހާދިސާތަކަކާ ގުޅިގެން، އުސް އިމާރާތްތަކުގެ ރައްކާތެރިކަމުގެ މިންގަނޑުތައް މިހާރަށްވުރެ ހަރުދަނާކުރުމުގެ މުހިންމުކަން ބޮޑުވެފައިވާ ދަނޑިވަޅެއްގައެވެ.

މިފަދަ ހާދިސާތަކާމެދު އާންމުންގެ ހޭލުންތެރިކަން އިތުރުކުރުމަށް ގޮވާލައްވަމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މީހުން ދިރިއުޅޭ ޓަވަރުތަކުގެ ކުޑަދޮރުތަކާއި، ބެލްކަނީތައް އަދި ރެއިލިންގތަކުގެ ރައްކާތެރިކަން އިތުރަށް ވަރުގަދަކުރުމަށް އިލްތިމާސްކުރައްވާފައެވެ. އަދި ޚާއްޞަކޮށް ކުޑަކުދިންނާއި، ޚާއްޞަ އެހީއަށް ބޭނުންވާ ފަރާތްތަކުގެ އިތުރުން ނަފްސާނީ ދުޅަހެޔޮކަމުގެ މައްސަލަތައް ހުންނަ ފަރާތްތައް ދިރިއުޅޭ ޔުނިޓުތަކުގެ ސަލާމަތީ ކަންކަމަށް ޚާއްޞަ ސަމާލުކަމެއް ދިނުމުގެ މުހިންމުކަން ރައީސް ވަނީ ފާހަގަކުރައްވާފައެވެ.