ދ. މީދޫގައި 30 ޓަނުގެ އައިސް ޕްލާންޓާއި ސްޓޯރޭޖް ފެސިލިޓީ ހުޅުވައިފި
މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ދާލު އަތޮޅު މީދޫގައި ތަރައްޤީ ކުރި 30 ޓަނުގެ އައިސް ޕްލާންޓާއި 50 ޓަނުގެ އައިސް ސްޓޯރޭޖް ފެސިލިޓީ ރަސްމީކޮށް އިފްތިތާހުކޮށްފިއެވެ.
މީދޫގައި އަޅާ އައިސް ޕްލާންޓް އެޅުމުގެ މަސައްކަތް މިފްކޯއާ ހަވާލުކުރީ މިދިޔަ އަހަރުގެ ސެޕްޓެމްބަރު މަހުގެ 24 ވަނަ ދުވަހުއެވެ.
މި ފެސިލިޓީ އިފްތިތާހުކޮށްދެއްވީ މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަހުމަދު ޝިޔާމް، އިއްޔެ މީދޫގައި ބޭއްވި ހާއްސަ ރަސްމިއްޔާތެއްގައެވެ. މި ހަރަކާތުގައި މިފްކޯގެ ޗީފް އެގްޒެކެޓިވް އޮފިސަރު ބްރިގޭޑިއާ ޖެނެރަލް (ރިޓަޔާޑް) ފަރުހާތު ޝަހީރާއި އިސްލާމީ މަރުކަޒުގެ ހެޑް އިމާމް ޝެއިހް މުހައްމަދު ލަތީފް އަދި މީދޫ އައިލެންޑް ކައުންސިލްގެ ރައީސް ބައިވެރިވެވަޑައިގެންނެވިއެވެ.
މަސްވެރިންނަށް އައިސް ލިބޭނެ ގޮތް ރަނގަޅު ކުރުމަށްޓަކައި މުޅި ރާއްޖޭގައި އައިސް ޕްލާންޓްތައް ޤާއިމް ކުރަމުން އަންނަ ކަމަށް ސަރުކާރުން ބުނެފައިވެއެވެ. މީދޫ އައިސް ޕްލާންޓަކީ 11 ރަށެއްގައި އައިސް ޕްލާންޓް ޤާއިމް ކުރުމަށް ސަރުކާރުން ކުރަމުންދާ މަޝްރޫއުގެ ދަށުން ހިންގާ މަޝްރޫއެކެވެ.
މި ފެސިލިޓީގައި ދުވާލަކު 30 ޓަނުގެ އައިސް އުފެއްދުމުގެ ގާބިލްކަން ހުރިއިރު، 50 ޓަނުގެ އައިސް ރައްކާކުރެވޭނެ ތަނެއް ވެސް ހިމެނެއެވެ.
އިތުރު އައިސް ޕްލާންޓްތައް ތައާރަފް ކުރުމުން މަސްވެރިކަމުގެ ސިނާއަތަށް އައިސް ޕްލާންޓްތަކުގެ ގައުމީ ނެޓްވޯކްގެ ކެޕޭސިޓީ ވަރަށް ބޮޑަށް އިތުރުވާނެ ކަމަށް ބެލެވެއެވެ. މިހާރުވެސް 25 ރަށެއްގައި އައިސް ޕްލާންޓްތައް ޤާއިމްކޮށްފައިވާއިރު، ފެނަކަ ކޯޕަރޭޝަން ލިމިޓެޑުން ހިންގާ އައިސް ޕްލާންޓްތަކުގެ މެނޭޖްމަންޓް މިފްކޯއާ ހަވާލުކުރުމުގެ މަސައްކަތްވެސް ސަރުކާރުން ދަނީ ކުރަމުންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
