ބީއެމްއެލްގެ "އާޔާ" އަށް ބޮޑު އަޕްގްރޭޑެއް: ކަސްޓަމަރުންގެ ސުވާލުތަކަށް އަވަސް ޖަވާބެއް ލިބޭނެ

ބޭންކް އޮފް މޯލްޑިވްސް (ބީއެމްއެލް) އިން އެ ބޭންކުގެ އޭއައި ޑިޖިޓަލް ބޭންކިންގ އެސިސްޓަންޓް "އާޔާ" އަށް މުހިންމު އަޕްޑޭޓްތަކެއް ގެނެސް، ޚިދުމަތްތައް އިތުރަށް ފުރިހަމަކޮށްފިއެވެ.

ބީއެމްއެލް މޮބައިލް އެޕް އަދި އިންޓަރނެޓް ބޭންކިންގ މެދުވެރިކޮށް މިހާރު މި ޚިދުމަތް ލިބޭނެއެވެ. މި އަޕްގްރޭޑާއެކު، މީގެ ކުރިން މޮބައިލް އެޕާއި ވެބް ޕޯޓަލް މެދުވެރިކޮށް ބޭންކިންގ ރިކުއެސްޓްތައް ފޮނުވުމަށް ބޭނުންކުރި މެސެޖިންގ ފީޗާ ވަނީ މެދުކަނޑާލާފައެވެ. އޭގެ ބަދަލުގައި ހުރިހާ ސުވާލުތަކާއި ހުށަހެޅުންތައް މިހާރު ކުރިއަށްދާނީ "އާޔާ" މެދުވެރިކޮށް ވަރަށް ފަސޭހަ ނިޒާމެއްގެ ތެރެއިންނެވެ.

ބީއެމްއެލް އިން ހާމަކުރި ގޮތުގައި، އަޕްޑޭޓް ކުރެވުނު "އާޔާ" އަކީ އާންމުކޮށް ކުރިމަތިވާ ސުވާލުތަކަށް އަމިއްލައަށް ޖަވާބުދީ، ބޭންކިންގ ރިކުއެސްޓްތައް އަވަސްކަމާއެކު ނިންމައިދިނުމުގެ ގާބިލުކަން ލިބިފައިވާ އެސިސްޓަންޓެކެވެ. މީގެ އިތުރުން، ކަސްޓަމަރުން ބޭންކުގެ މުވައްޒަފަކާ ސީދާ ވާހަކަދައްކަން ބޭނުންވާ ހާލަތްތަކުގައި، "އާޔާ" މެދުވެރިކޮށް ދުވާލަކު 24 ގަޑިއިރު، ހަފްތާއަކު 7 ދުވަހު ބޭންކުގެ މުވައްޒަފަކާ ގުޅައިދިނުމުގެ ފުރުސަތު ވެސް އޮންނާނެއެވެ.

މި ބަދަލާ ގުޅޭގޮތުން ބޭންކުން ބުނީ، މިއީ ޓެކްނޮލޮޖީގެ އެހީގައި ކަސްޓަމަރުންނަށް ދޭ ޚިދުމަތުގެ ފެންވަރު ރަނގަޅުކޮށް، ލުއިފަސޭހަކަން ހޯދައިދިނުމަށް ކުރާ މަސައްކަތުގެ ތެރެއިން އެޅުނު ފިޔަވަޅެއް ކަމަށެވެ. "އާޔާ" މެދުވެރިކޮށް ޚިދުމަތްތައް ދިނުމުން، ކަސްޓަމަރުންނަށް އަވަސް އަދި އެއްހަމައެއްގައި ޖަވާބު ލިބުމަށް މަގުފަހިވާނެ ކަމަށް ބޭންކުން ފާހަގަކުރެއެވެ.

"އާޔާ" އަކީ ބީއެމްއެލްގެ އެންމެ ފުރަތަމަ އޭއައި ޑިޖިޓަލް އެސިސްޓަންޓްގެ ގޮތުގައި 31 މޭ 2023 ގައި ތައާރަފުކުރި ޚިދުމަތެކެވެ. މި ޚިދުމަތުގެ ބޭނުމަކީ ކޮންމެ ވަގުތަކުވެސް މެދުކެނޑުމެއްނެތި ކަސްޓަމަރުންނަށް އެހީތެރިކަން ފޯރުކޮށްދިނުމެވެ. މި ފަހަރު ގެނެވުނު ބަދަލުތަކަކީ ބޭންކުގެ ޑިޖިޓަލް ޚިދުމަތްތައް ޒަމާނީކޮށް، ކަސްޓަމަރުންނަށް ފަސޭހަ ތަޖުރިބާއެއް ފޯރުކޮށްދިނުމަށް ބޭންކުން ގެންގުޅޭ ހާއްސަ ސްޓްރެޓެޖީގެ ބައެކެވެ.