ރާއްޖެ އިސްލާމްވީތާ 900 އަހަރު ފުރުމާ ދިމާކޮށް ޒުވާން ޚަޠީބުންގެ ޤައުމީ މަހާސިންތާއެއް ބާއްވަނީ

ރާއްޖެ އިސްލާމްވީ ދުވަހުގެ މުނާސަބަތާއި، ރާއްޖެ އިސްލާމްވީތާ 900 އަހަރު ފުރުމުގެ ތާރީޚީ މުނާސަބާގައި، އިސްލާމީ ކަންތައްތަކާ ބެހޭ ވުޒާރާއިން "ޒުވާން ޚަޠީބުންގެ ޤައުމީ މަހާސިންތާ" ބޭއްވުމަށް ނިންމައިފިއެވެ.

މި މަހާސިންތާ ބޭއްވުމަށް ހަމަޖެހިފައިވަނީ 13 ސެޕްޓެމްބަރު 2026 (2 ރަބީޢުލްޢާޚިރް 1448) ގައެވެ. މިއީ ރާއްޖެ އިސްލާމްވިތާ 900 އަހަރު ފުރޭ ތާރީޚީ މުނާސަބަތާ ދިމާކޮށް ބާއްވާ ވަރަށް ޚާއްޞަ ބައްދަލުވުމެކެވެ. އިސްލާމީ ކަންތައްތަކާ ބެހޭ ވުޒާރާއިން މަޢުލޫމާތު ދެއްވާ ގޮތުގައި، މި މަހާސިންތާއަށް މައްކާގެ މަސްޖިދުލް ޙަރަމްގެ އިމާމު ފަޟީލަތުއްޝައިޚު ޑރ. ޔާސިރް އައްދައުސަރީއަށް މިހާރު ވަނީ ދައުވަތު ފޮނުއްވާފައެވެ.

މި މަހާސިންތާގައި ބައިވެރިވުމަށް އަތޮޅުތަކުގައި ތިބި ޒުވާން ޚަޠީބުން މާލެ ގެނައުމުގެ އިންތިޒާމުތައް ވުޒާރާއިން ހަމަޖައްސަވާނެއެވެ. މި ބައްދަލުވުމުގައި ވުޒާރާއިން ތަމްރީން ކުރާ 1000 ޒުވާން އިމާމުންނާއި ޚަޠީބުންގެ އިތުރުން ރާއްޖޭގެ ޒުވާން ޙާފިޒުން ބައިވެރިވާނެއެވެ. މިހާތަނަށް ރާއްޖޭގެ ޙާފިޒުންގެ ދަފްތަރުގައި 307 ޙާފިޒުން ތިބިއިރު، ޒުވާން ޚަޠީބުންގެ އަދަދަކީ 532 އެވެ. ނަމަވެސް ސެޕްޓެމްބަރު މަހުގެ ކުރިން 1000 ޚަޠީބުން ހަމަކުރުމަކީ ސަރުކާރުގެ އަމާޒެކެވެ.

މިއީ ރާއްޖޭގެ ކުރިއަށް އޮތް އިސްލާމީ ޤަރުނަށް، ރާއްޖޭގެ އިސްލާމީ ޝިޢާރު ފާޅުކުރުމުގެ އިސްދައުރު އަދާކުރާނެ ޒުވާން ޖީލެއް ބިނާކުރުމަށް ލިބޭ މުހިންމު ފުރުޞަތެކެވެ. އެހެންކަމުން، ޒުވާން ޚަޠީބުން މިހާރުން ފެށިގެން މި މަހާސިންތާއަށް ތައްޔާރުވުމަށާއި، އިމާމުކަމުގެ ހެދުންކޮޅާއި ތާކިހާ ތައްޔާރުކުރެއްވުމަށް ވުޒާރާއިން ވަނީ އިރުޝާދު ދެއްވާފައެވެ.

މި މަހާސިންތާގައި ބައިވެރިވާން ބޭނުންވާ ފަރާތްތަކުން ފޯމު ހުށަހެޅުމުގެ ފުރުޞަތު މި މަސްތެރޭގައި ހުޅުވާލައި، އެކަން އިޢުލާން ކުރައްވާނެ ކަމަށްވެސް އިސްލާމީ ކަންތައްތަކާ ބެހޭ ވުޒާރާއިން ވިދާޅުވިއެވެ.