އެމްޑީޕީގެ ރިޔާސީ ޕްރައިމަރީގައި ވާދަނުކުރައްވަން ނިންމަވައި، ފައިސަލް ނަސީމަށް ތާއީދުކުރެއްވުމަށް ރައީސް ސޯލިހު ނިންމަވައިފި

މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ރިޔާސީ ޕްރަމަރީގައި ވާދަނުކުރައްވަން ނިންމަވައި، މިދިޔަ އެމްޑީޕީގެ ވެރިކަމުގެ ނައިބު ރައީސްގެ މަގާމް އަދާކުރެއްވި ފައިސަލް ނަސީމަށް ތާއިދު ކުރައްވަން ކުރީގެ ރައީސް އިބްރާހީމް މުހައްމަދު ސޯލިހު (ރައީސް އިބޫ) ނިންމަވައިފިއެވެ.

ރައީސް އިބޫ އެމްޑީޕީގެ ޕްރައިމަރީގައި ވާދަކުރައްވާނެކަމުގެ އަޑުތައް މީގެ ކުރިން ފެންމަތިވެފައިވާއިރު، އެމަނިކުފާނުގެ އަރިސް ބޭފުޅުން ވެސް އެކަން މީޑިއާތަކަށް ކަށަވަރުކޮށްދެއްވާފައިވެއެވެ. ނަމަވެސް އެމަނިކުފާނުގެ އެ ނިންމެވުން ބަދަލުކުރައްވާ ފައިސަލްއަށް ތާއިދުކުރެއްވުމަށް ވަނީ ނިންމަވާފައެވެ.

އިތުބާރުހުރި ފަރާތަކުން 'އެމްއެމް ޓީވީ' އަށް މައުލޫމާތު ދެމުން ބުނީ ރައީސް އިބޫ އެގޮތަށް ނިންމަވާފައިވާ ކަމަށާއި، ފައިސަލް ވާދަކުރައްވާނެކަން މިއަދު ނުވަތަ މާދަމާ ރަސްމީކޮށް އިއުލާނު ކުރައްވާނެ ކަމަށެވެ. މައުލޫމާތު ލިބިފައިވާ ގޮތުގައި، 2028 ގެ ރިޔާސީ އިންތިހާބުގެ އެމްޑީޕީ ޕްރައިމަރީގައި ރައީސް އިބޫ ވާދަ ނުކުރައްވަން ނިންމަވާ އެކަން ޓީމާ މިހާރު ވަނީ ހިއްސާކުރައްވައިފައެވެ. އަދި ފައިސަލަށް ތާއިދުކުރައްވާ ޕްރައިމަރީއަށް ނެރުއްވުމަށް ރައީސް އިބޫ ފުރިހަމައަށް ތާއިދުކުރައްވާ ކަމަށް މައުލޫމާތުލިބިފައިވެއެވެ.

ފެހި ގާނޫނު އަސާސީއަށް އަމަލުކުރަން ފެށިފަހުން ނައިބު ރައީސް ކަމުގެ ދައުރު ފުރިހަމަ ކުރެއްވި ހަމައެކަނި ނައިބު ރައީސް ފައިސަލް ނަސީމަށް ރައީސް އިބޫ ތާއިދު ކުރައްވާކަން ހާމަކުރައްވާފައިވާ އިރު، ފައިސަލްގެ ރަނިންމޭޓެއްގެ ގޮތުގައި ރައީސް އިބޫ ތާއިދު ކުރައްވަނީ މާލެ ސިޓީގެ މިހާރުގެ މޭޔަރު އާދަމް އާޒިމަށެވެ.

ރައީސް އިބޫގެ މި ނިންމެވުމަށްފަހު، ކުރިއަށް އޮތް ކުޑަ ދުވަސްކޮޅެއްގެ ތެރޭގައި ފައިސަލް ރަސްމީކޮށް ކެމްޕޭން ފެއްޓެވުމަށް ވަނީ ނިންމަވާފައެވެ.

އިދިކޮޅު މައި ސިޔާސީ ޕާޓީ އެމްޑީޕީގެ ރިޔާސީ ޕްރައިމަރީ ކައިރިވެފައިވާއިރު، މިހާތަނަށް ރިޔާސީ ޕްރައިމަރީގައި ވާދަކުރައްވާނެ ކަމުގެ އިޝާރާތެއް ކުރައްވާފައިވަނީ ފައިސަލްގެ އިތުރުން އެމްޑީޕީގެ ކުރީގެ ޗެއަރޕާސަން ފައްޔާޒު އިސްމާއިލްގެ އިތުރުން، ޕާޓީގެ ރައީސް އަބްދުﷲ ޝާހިދު އަދި ހުޅުމާލެ ދެކުނު ދާއިރާގެ އެމްޑީޕީ މެންބަރު ޑރ. ޝަމްހީދުއެވެ.

އެމްޑީޕީގެ ޗެއަރޕާސަންގެ މަގާމަށް ދާދި ފަހުން ވަޑައިގެންނެވި ކުރީގެ ރައީސް މުހައްމަދު ނަޝީދު ވަނީ ފައްޔާޒަށް ތާއިދުކޮށް ކެމްޕޭން ވެސް ފައްޓަވާފައެވެ. ނަމަވެސް ރައީސް ނަޝީދުގެ ސަޕޯޓަރުން ދަނީ ފައްޔާޒު ފެއަށް ޖެހިވަޑައިގެން 2028 ގެ ރިޔާސީ އިންތިހާބުގައި ރައީސް ނަޝީދު ވާދަކުރައްވަން ފުރުސަތު ދެއްވުމަށް ގޮވާލަމުންނެވެ.