ތިމާވެއްޓާ ރައްޓެހި ދަތުރުފަތުރަށް އިންގިލާބީ ބަދަލެއް: ރާއްޖެއަށް 100 އިލެކްޓްރިކް 'ވޯޓަރ ޓެކްސީ' ގެންނަނީ

ރާއްޖޭގެ ރަށްތަކާއި، ރިސޯޓުތަކުގެ އިތުރުން އެއާޕޯޓްތަކާ ދެމެދު ކުރާ ދަތުރުތައް ތިމާވެއްޓާ ރައްޓެހި އަދި ޒަމާނީ ނިޒާމަކަށް ބަދަލުކުރުމަށްޓަކައި، އެމެރިކާގެ "ނޭވިއަރ" ކުންފުނިން 100 އިލެކްޓްރިކް ވޯޓަރ ޓެކްސީ ރާއްޖެއަށް ތަޢާރަފްކުރަން ނިންމައިފިއެވެ.

ސެން ފްރެންސިސްކޯއަށް ނިސްބަތްވާ، ނާސާގެ ކުރީގެ ރިސާޗަރަކާއި އެމް.އައި.ޓީގެ އިންޖީނޭރެއް ކަމަށްވާ ސަމްޕްރިތީ ބަޓަޗާރިޔާ 2020 ވަނަ އަހަރު އުފެއްދި މި ކުންފުނިން ރާއްޖޭގެ ކަނޑުތަކުގައި މި އުޅަނދުތައް ދުއްވުމަށް ހަމަޖެހިފައިވަނީ "ކަނޑުމަތީގެ ލަގްޒަރީ ޓެކްސީ" ތަކެއްގެ ގޮތުގައެވެ.

މި ބިޔަ މަޝްރޫޢަކީ ދުބާއީގެ އިންވެސްޓްމަންޓް ފާމެއް ކަމަށްވާ "ޖޭ.އައި.އެޗް ގްލޯބަލް" އާއި ނޭވިއަރ ކުންފުންޏާ ދެމެދު ވެވުނު ގާތްގަނޑަކަށް 100 މިލިއަން ޑޮލަރުގެ އެއްބަސްވުމެއްގެ ދަށުން ކުރިއަށްދާ މަޝްރޫޢެކެވެ. ކުރިއަށް އޮތް ތިން އަހަރު ދުވަހުގެ ތެރޭގައި މި އުޅަނދުތައް ރާއްޖެއަށް ގެނެސް ނިންމުމަށް ހަމަޖެހިފައިވާއިރު، މިއީ މުޅި ދުނިޔޭގައިވެސް ކަނޑުމަތީގެ އިލެކްޓްރިކް ދަތުރުފަތުރުގެ ނިޒާމެއް މިހާ ބޮޑު މިނެއްގައި ޓެސްޓު ކުރެވޭ ފުރަތަމަ ފަހަރެވެ. ރާއްޖޭގައި މި އުޅަނދުތައް އޮޕަރޭޓްކުރާނީ ރާއްޖޭގެ ޑިވެލޮޕަރެއް ކަމަށްވާ "ހަރިމް" އިންނެވެ.

ރާއްޖެއަށް ގެނައުމަށް ހަމަޖެހިފައިވަނީ ނޭވިއަރ ކުންފުނީގެ އެންމެ ފަހުގެ "އެން30" މޮޑެލްގެ އުޅަނދުތަކެވެ. 30 ފޫޓު ދިގު މި އުޅަނދުތަކަކީ އަށް ފަސިންޖަރުންނާއި ޑްރައިވަރަކަށް ދަތުރުކުރެވޭ ގޮތަށް ފަރުމާކޮށްފައިވާ އުޅަނދުތަކެކެވެ. މި އުޅަނދުތަކުގައި ހަރުކޮށްފައިވާ ތިން "ކާބަން ފޮއިލް" ގެ އެހީގައި، ދުއްވާފައި ދާއިރު ލޮނުގަނޑުން ހަތަރު ފޫޓު މައްޗަށް އުޅަނދު ހިއްލިލައެވެ. މީގެ ސަބަބުން ކަނޑުގެ ރާޅުތަކުގެ ސަބަބުން ކުރާ އަސަރު ކުޑަވެ، ދަތުރުވެރިންނަށް ވަރަށް އޮމާން ދަތުރެއް ތަޖުރިބާކުރެވޭނެއެވެ.

މި އުޅަނދުގައި ހުންނަ ސެންސަރުތަކުން ކަނޑުގެ ރާޅު ހުރިގޮތް ދެނެގަނެ، އުޅަނދުގެ ފޮއިލްތަކަށް ސިކުންތަކު 50 ފަހަރު ބަދަލު ގެނެސްދެއެވެ. 90 ކިލޯވޮޓްގެ ދެ އިލެކްޓްރިކް މޮޓޯ ހުންނަ މި އުޅަނދުގެ އެންމެ ހަލުވި ދުވެއްޔަކީ 35 ނޮޓްސް އެވެ. އަދި މިއީ އާދައިގެ ތެޔޮ އަޅައިގެން ދުއްވާ ލޯންޗުފަހަރަށްވުރެ 10 ގުނަ އިގްތިސާދީ، ތިމާވެއްޓާ ރައްޓެހި އުޅަނދެއް ކަމަށް އެ ކުންފުނިން ބުނެއެވެ.

ނޭވިއަރ ކުންފުނިން މިހާރު ދަނީ 60 ފޫޓާއި 120 ފޫޓުގެ ބޮޑެތި އުޅަނދުތަކާއި، ދުރު ރާސްތާއަށް ދަތުރުކުރެވޭނެ ހައިބްރިޑް އުޅަނދުތައް ފަރުމާކުރުމުގެ މަސައްކަތްވެސް ކުރަމުންނެވެ. ރާއްޖޭގައި ފަށާ މި މަޝްރޫޢުގެ ދަށުން، މިއަހަރުގެ ތެރޭގައި ފުރަތަމަ ފަސް އުޅަނދު ރާއްޖެއަށް ފޯރުކޮށްދިނުމަށް ވަނީ ހަމަޖެހިފައެވެ.

މި އައު އުޅަނދުތަކާއެކު، ރާއްޖޭގެ ފަތުރުވެރިކަމުގެ ދާއިރާއަށާއި އާންމު ދަތުރުފަތުރުގެ ނިޒާމަށް ތިމާވެއްޓާ ރައްޓެހި، ޒަމާނީ އަދި ހިތްގައިމު ބަދަލެއް އަންނާނެ ކަމަށް ބެލެވެއެވެ.