ބައިނަލްއަޤްވާމީ އަންހެން ކުދިންގެ ދުވަސް: އަންހެން ކުދިންގެ ޤާބިލުކަމާއި ހުނަރު ފާހަގަކުރައްވައި މެޑަމް ސާޖިދާ ތަހުނިޔާ ވިދާޅުވެއްޖެ

ބައިނަލްއަޤްވާމީ ގޮތުން ފާހަގަކުރާ އަންހެން ކުދިންގެ ދުވަހުގެ މުނާސަބަތުގައި، ދިވެހިރާއްޖެއާއި މުޅި ދުނިޔޭގެ އެކި ކަންކޮޅުތަކުގައި ތިބި އަންހެން ކުދިންގެ ހިތްވަރާއި، އުންމީދުތަކާއި އަދި އެކުދިންގެ ކިބައިގައިވާ ޤާބިލުކަން ފާހަގަކުރައްވައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަނބަލުން، މެޑަމް ސާޖިދާ މުޙައްމަދު ތަހުނިޔާ ވިދާޅުވެއްޖެއެވެ.

އޮކްޓޫބަރު މަހުގެ 11 ވަނަ ދުވަހު ފާހަގަކުރާ މި ދުވަހާ ގުޅިގެން ފަސްޓް ލޭޑީ ދެއްވި ޚާއްޞަ މެސެޖެއްގައި ވިދާޅުވީ، އަންހެން ކުދިންނަކީ މުޖުތަމަޢު ބައްޓަންކުރުމުގައި މުހިންމު ދައުރެއް އަދާކުރާ، ލީޑަރުންނާއި، އާ އީޖާދުތައް އުފައްދާ އަދި ހެޔޮ ބަދަލުތައް ގެނެސްދޭ ބައެއް ކަމަށެވެ. އަދި އެކުދިންގެ އަޑާއި ހުނަރަކީ މުޖުތަމަޢު ބާރުވެރިކުރުވުމުގައި ނުހަނު އަގުހުރި އެއްޗެއްކަން އެކަމަނާ ފާހަގަކުރެއްވިއެވެ.

"އަންހެން ކުދިން ބާރުވެރިކުރެވިއްޖެނަމަ، އެކަމުގެ ސަބަބުން ބަދަލުވެގެންދަނީ ހަމައެކަނި އެކުދިންގެ އަމިއްލަ ދިރިއުޅުމެއް ނޫނެވެ. އޭގެ ބަދަލުގައި އެކުދިން އުފުލަނީ މުޅި ޤައުމުގެ މުސްތަޤުބަލެވެ،" މެޑަމް ސާޖިދާ ވިދާޅުވިއެވެ.

މީގެއިތުރުން، ދިވެހިރާއްޖޭގެ އަންހެން ކުދިންނާއި ޒުވާން އަންހެނުން ތަޢުލީމީ ދާއިރާއާއި، ޢާންމު ޚިދުމަތްތަކާއި، ވިޔަފާރިއާއި، ކުޅިވަރުގެ އިތުރުން މުޖުތަމަޢުގެ އިސް ސަފުގައި ފާހަގަކޮށްލެވޭ ފަދަ ބޮޑެތި ކާމިޔާބީތަކެއް ހޯދަމުންދާކަން ފަސްޓް ލޭޑީ ފާހަގަކުރެއްވިއެވެ. އަދި އެކުދިންގެ މި ކާމިޔާބީތަކަކީ ހަރުދަނާ އަދި ވިލުންވެރި ޤައުމެއް ބިނާކުރުމަށް އެޅޭ ވަރަށް މުހިންމު ބާރެއް ކަމަށް ވިދާޅުވެ، ޤައުމީ ތަރައްޤީގައި އަންހެން ކުދިން އަދާކުރާ ދައުރު ބަލައިގަތުމުގެ މުހިންމުކަމުގެ މައްޗަށް އެކަމަނާ އަލިއަޅުއްވާލެއްވިއެވެ.

ކޮންމެ އަހަރެއްގެ ވެސް އޮކްޓޫބަރު މަހުގެ 11 ވަނަ ދުވަސް ބައިނަލްއަޤްވާމީ އަންހެން ކުދިންގެ ދުވަހުގެ ގޮތުގައި ފާހަގަކުރަނީ އަންހެން ކުދިންގެ ޙައްޤުތައް ކަށަވަރުކޮށްދިނުމަށާއި، ތަޢުލީމު އުނގެނުމާއި، އިސްނަގައިގެން މަސައްކަތްކުރުމުގެ ފުރުޞަތުތައް ފަހިކޮށްދީ، އެކުދިންގެ ފުރިހަމަ ޤާބިލުކަން ދެއްކުމަށް މަގުފަހިކޮށްދިނުމުގެ މުހިންމުކަން މުޅި ދުނިޔެއަށް ހަނދާންކޮށްދިނުމުގެ މަޤްޞަދުގައެވެ.